నిజం చెప్పు ?

శైలజామిత్ర // 9-03-2013

నీవు నా ప్రకృతికి 

ముమ్మాటికీ వికృత రుపానివి 

నీ ఉనికి సంకేతం 

నా అంతరాత్మకు వ్యతిరేకం 

ఎప్పుడో ఇవి కలిసి బతికినట్లు భ్రాంతి 

మళ్ళీ తిరగేస్తే అంతా శూన్యం 

ఒకప్పుడు అనుకూలంగా 

మరొకనాడు విభెధమై 

నన్ను నిన్నుగా చూసుకుంటావు 

ఇదేమిటని అడిగే లోగానే 

నీవు చేసే కన్నీటి రొదను అడవిలా వినమంటావు 

మరుక్షణమే అనుకున్నది 

తు చ తప్పకుండా చేసేస్తావు 

నీరు లేని నింగి 

మబ్బుల్ని దాచుకుని నవ్వుతుంటే 

కన్నీరుతో తడిసి ముద్దయిన భూమి  

మేఘమైతే చాలదా?

నా ఉనికి నీ గుండెను తాకడానికి 

నడిచే నా వెనుక ఒక రాత్రిలా నడుస్తూ 

అప్పుడప్పుడు వెన్నెల ముసుగు తొడుక్కుని 

ముళ్ళ కంపల అనుభవంతో 

ఎదురయ్యే నీవు 

అబ్బో విశ్వ మాతవే !

కాదంటావా? నిజం చెప్పు?