చిత్రం - విచిత్రం
ఉదయం ఎన్నో హావభావాల చిత్రం
హృదయం ప్రేమ విచిత్రం
ఈ చిత్ర విచిత్రాల నడుమ
రాత్రి ఊహల ఉయ్యాల లూగే వర్ణ చిత్రం
ఆశ మనల్ని అనుసరించే భావ చిత్రం
అత్యాశ మనలోంచి మనల్ని వేరు చేసే
ఆధునిక విచిత్రం
ఈ చిత్ర విచిత్రాల నడుమ
ఆశయం అందరినీ తోడు తీసుకుని
ఒక తాటిపై నడిపించే అపురూప చిత్రం
ఒకచోట గెలిచి, మరొక చోట ఘోరంగా
అవమానించ బడినా అదొక అనుభవ చిత్రం
ప్రతిచోటా విజయ బావుటా ఎగరవేస్తున్నా
ఆ గజమాలను నువ్వు తప్ప అందరూ మోస్తున్న
అదొక సరదా విచిత్రం
పలకరింపుకు విలువను చూపుతూ
పళ్ళికిలించకున్నా చిరునవ్వుతో ఆహ్వనించేది
ఒక అనుభూతి చిత్రం
పంటి పంటికి విలువకట్టి అక్కున చేర్చుకునేది
మసక బారిపోయే తాత్కాలిక విచిత్రం
మాట ముత్యమైతే అది బంధనా చిత్రం
సత్యమైతే ఆత్మీయతా చిత్రం
అతితెలివి ద్వారభందాల మధ్య నుండి వచ్చే
మాటలన్నీ అవసరం సోరుగులోనివైతే
అది కాలానికి వేళ్ళాడే గాజు రాళ్ళ చిత్రం
కట్టు మనమెంటో తెలిపే మొదటి చిత్రం
కలిసికట్టు మనకు కనిపించే మనసు చిత్రం
కాలం మనల్ని అనుసరించే మౌన చిత్రం
కన్నీరు గుండెను తేలిక పరిచే వాస్తవ చిత్రం
ఇంత భారాన్ని మోస్తున్న మనిషి జీవితం
ఒకరికి ఒకరు అర్థం చేసుకోలేని విషాద చిత్రం !