భావ చిత్రం 

కొత్త నెల 

సరికొత్త సంవత్సరం 

కొత్త నవ్వు 

సరికొత్త దు:ఖం 

కొత్త చలి 

సరికొత్త వేసవి 

పాత మనసు 

మార్పు లేని 

మార్చుకోలేని 

అదే మనిషి తీరు !

బంధాలను కాదని 

ద్వార బంధాలను ముసేస్తున్న 

నూతనత్వపు తేరు !

ముఖాలను దాటి 

ముఖ స్తుతులను అనుసరిస్తున్న 

అంతస్తుల హోరు !

సునితత్వపు  నూనె లేక తుప్పు పట్టి 

కిర్రు కిర్రు మంటున్న హృదయ కవాటాలు !

'మనం ' పదం వినబడక ... 

సమూహం లో ఒంటరై 

ఆనందంగా ఆహ్వానించలేని ఇంటి వాకిళ్ళు !

సఖ్యత మరచిన మనసు లోగిళ్ళు తేలికై 

నేలకొరుగుతున్న నిలువెత్తు కుటుంబ వృక్షాలు !

భావ సంపదను  మరచిన అక్షరాలు 

కనిపించని ఆకుపచ్చని కవికోసం ఎదురుచూస్తూ 

కాలాన్ని బంధించి  కలాలకు సవాలు విసురుతున్న వైనాలు !

మార్పు రాని నూతనత్వం 

నేలపై పడిన నూనె లాంటిది !

ఎంత జాగ్రత్తగా అడుగులు వేసినా 

జారిపడటానికే  అవకాశం ఎక్కువ !

అది సంస్కృతీ సాంప్రదాయాలకే  పెద్ద సవాలు !