నీకోసం ..!

నేను నిన్ను  అనుసరిస్తూనే ఉంటాను 

ఒక్కసారైనా  వెనుతిరిగి చూస్తావేమొ అని..  

నిద్రను , మేలకువను రెంటినీ ఏకం చేసి 

నిశ్శబ్దాన్ని పరిపూర్ణం చేస్తూనే ఉంటాను 

ఎప్పటికైనా నా పిలుపులో ఆర్ధ్రతను గుర్తిస్తావేమో అని..

శరీరాన్ని ఇంద్రధనువును  చేసి 

నీకై ఎదురుచూస్తూనే ఉంటాను 

ఒక్క నిముషమైనా నా చూపుల తాకిడి 

నిన్ను మేల్కొలుపుతుందేమో అని.. 

హృదయాన్ని హరివిల్లును  చేసి 

నీకు అందిద్దామని అనుకుంటూనే ఉంటాను

నీ మాటల పరిమళం నన్ను తాకుతుందేమో అని. 

అయినా ప్రియా !

నా గుండె ఆకాశమే నీవైనప్పుడు 

వెదకడానికి ఏముందని ?

నా శ్వాసే నీ నామమైనప్పుడు 

ఎదురు చూడడానికి ఏమి మిగిలిందని ?

ఆకృతి లేని ఆత్మస్వరూపం  

నిన్ను బహుమానంగా నాకిచ్చినప్పుడు 

గుర్తించడానికి ఏముందని ?