మా ఊరి చిత్రం

నా భుజంపై తల వాల్చి 

నా గుండెపై చిన్ని పాదాలు మోపి 

చిట్టి మోకాళ్ళు నన్నల్లుకుని 

నన్ను అనుకుని ఉండేది 

మా ఊరి చిత్రం 

ఏమైందో ఏమో

మసకబారిన ముఖంతో 

మోయలేని భారాన్ని మోస్తున్నట్లు 

మనసు ఉయ్యాల లోంచి 

కిందకు జారిపోయింది

నిండైన దృశ్యం చెదిరిపోయింది 

ఉల్లాసంతో ఎగిరి పడే చేప 

వెల్లకిలా పడినట్లుంది ఆ రూపం 

కలల కొలనులో 

మహారాణి లా  ఉండే చందమామ 

నాతో పాటు తుళ్ళిపడే వాన నేస్తం 

చిన్ని పాపలను ఓలలాడించే 

రెండెడ్ల బండి మువ్వల సవ్వడి 

వయస్సు ఉడిగినట్లు గా మారి 

నన్ను చూసి బోసి నవ్వునవ్వాయి 

సూర్యకిరణం మీది నుంచి దూకే 

కుందేటి వెచ్చదనాన్ని తోడు తెచ్చుకుని 

మూడో కాలు ఆసరాగా నడుస్తుంటే 

నువ్వూ  అంతేగా పిల్లా 

అంటూ ఊరు నవ్వుతోంది 

పైర గాలిలో తుమ్మెదల్లా సాగిపోతున్న 

రంగురంగుల ఉహలు 

ముసిరిన మబ్బులయితే 

వాస్తవాలు  ఉండుండి మెరిసే  

మెరుపులవుతాయి 

నీలాకాశంలో వెండి పడవ 

రెండు విశ్వాస తీర్మానాల మధ్య 

నిలుచున్న నా ఉపిరిలా ఉంది ..

అల్లిబిల్లిగా సాగే నీరెండ ముఖాల మధ్య 

అలికిడి నా ధరహాసంలా ఉంది..